Jai Guruji

Har Sadhak ko Mera Pranam

Sangatji, humaare mann ki sabse badi māng hoti hai — ki bas hamaare kaam ban jaayein. koi rukāvat na aaye.

 Hum lambi chhosi planning karte hai, mehnat karte hai,… par zindagi woh to hanste hue kehti hai: theek hai, dekhte hain. 

Kabhi kaam ban jaata hai, kabhi bikhar jaata hai. Bikhar gaye to udasiyat, ban gaye toh khone ka dar. 

Kare to kya kare?

Tab Shastra kehta hai, jeevan ko Shivji ke Charmon mein samarpit kar do. Kaam bhi ban jaayenge aur man ka Aaram bhi. 

Guruji ne bhi yahi samjhaya: 100% surrender is 100% protection.

Chaliye aaj samajhne ki koshish karte hai ki sacha samarpan kya hai, kyu kare aur jab kare toh kaise kare.

—————

shuru karte hai ek udahran se

do sadhu, safar ke dauraan, ek purani sarai mein ruk gaye. 

Lekin Raat ke sabse gehre peher main, maccharron ne unka chain chheen leta hai. 

Soft buzz sound, brief. 

Pehla sadhu gusse mein bol uthta hai: “Arre Prabhu! Yeh macchar kyun banaye? Srishti rachi, par yeh pareshani kyun? Na sone dete, na dhyan karne dete! Agar main hota, kabhi aisi na hone deta! Kum se kum apne bhakton ko to inn kadhinaiyon se bachaiye” 

Voice sharp, frustrated. Pause, soft bell chime.

 Sangatji, yeh hai niyantran ka swabhava—duniya ko apne hisaab se chalaane ki zid, shikayat se Bhagwan ko challenge karna, sochna ki meri dor hoti toh sab behtar hota.

Doosra sadhu palat kar muskurata hai, kehta hai: “Arre Prabhu, dhanyavaad! Macchar na hote, toh brahm muhurat mein sota reh jata. Yeh toh aapki anant kripa ho gayi!” 

Voice soft, grateful. 

wahi ghatna, ek ke liye shraap, doosre ke liye prasad. Ek ne niyantran ke chashme se dekha, aur kashm-a-kash shuru ho gayi. Doosre ne vishwas ke chashme se dekha, aur wahi kasht prasad ban gaya.

Sangatji, hamaari roz-marra ke jeevan mein yeh machar har jagah hai - traffic jam, boss ka darr, zindagi ke nirantar toofan. 

Ek ke liye pareshani, doosre ke liye kripa—jaisa drishtikon, waisa prabhav. 

Yahi se surrender shuru hota hai. 

Surrender ek purana French shabd hai, matlab apni zid chhodna. Sanskrit mein yeh aur gehra ho jaata hai—

samarpan, 

yaani bina shart ke apni “main” ka tyag dena.

Osho kehte hain: “Mind wants a guarantee.” Mann ka swabhav hai — woh hamesha guarantee chahta hai.

 Aur kitna sach bhi hai! Hum sab ek guarantee chahte hain — pyar ho toh meri sharton par, sapne ho toh woh jo mujhe suit kare. 

HUm zindagi ke har pehlu se apne liye ek guarantee chahte hia.

Lekin ek problem hai

inhi guarenteeyon ke chakkar mein hamaari zindagi bahut chhoti ho jaati hai. Kyunki guarantee ussi cheez ki li jaati hai jo hamari capability main ho. Aur Bhagwan ki banaayi hui iss vishal zindagi ki infinite possibilities ko hum apni kshamata ke dayre se unlimited to limited kar lete hai.

Kabhi dekha hai jab koi cricketer pitch par aata hai, uske pairon mein par lage hote hain, har stroke masterstroke ? Commentators garajte hue kehte he ‘ wah’ kya form hai 

1970 mein Western psychologist Mihaly ek aisi avastha ke bare mein kitab likhi jahan samay pighal jata hai, duniya mit jati hai, bas hum aur woh ek kshan - usee flow yaani “pravah” kaha

Pravah tab banti hai jab niyantra ki dor dheeli padh jaye, jeet-haar ki chinta choot jaye, aur us pal ki laya mein hum doob jaye.

Jaise ek patta nadi mein beh raha ho—na dhara se ladta hai, na manzil poochhta hai, bas vishwas ke saath behta rehta hai.

Aur yahi samarpan ki seedi ka pehla chadhav hai - har lehar ko chalaane ki zid chhod kar safar ka lutf udhana. Ek gehre vishwas ki jo bhi hoga, accha hoga.

Vishwas agar guarantee chahe, toh ek sauda ban jaata hai. Agar guarantee chhod de, toh azaadi ban jaata hai.

Sangatji, hamari soch kehti hai: “Pehle guarantee, phir vishwas.”
Lekin bhagwan sikhate hain: “Pehle vishwas, phir kripa.”

Kuch din pehle Goa mein ek alokik satsang hua. Satsang to sabhi ati sundarr hote hai, 

lekin uss din aisa saubhaya hamara ki waha Mojood Nikki aunty ne apni Shadi ka satsang sunaya. 

Ve 21 saal ki thi, Guruji apne chole main the aur ek din unki ma se bole Nikki ki Shaadi issi sal mein karni hai. Shaadi Par Guruji , ladka? Woh bhi mil jayega - tyyariya shuru karo. Unke mata pita Uttam sambandh dhoondhne mein jut gaye. Jab bhi ve Guruji se milte, Guruji poochte kapde banwa liye, zewar kharid liye, hall book kar diya kya? Jaise jaise Guruji kehte gaye Nikki aunty aur unka pariwar waise waise karta gaya. Diwali aayi toh Guruji bole card design karwa do. 

Lekin ek technical problem abhi bhi thi - abhi tak koi rishta pakka nahi hua tha. To Ma’ji boli- Guruji card toh banwaa de par naam kiska likhe. Guruji bole - mil jayega

Card bhi ban gaya. Guruji ko pasand bhi aaya. Sab kuch ready - dulhan ke kapde zewar, hall ki decoration, card aur mehmano list - missing tha toh ladka

Shaadi mein jab sirf do Maheene bache toh Guruji ke ladke ka naam bataya. Phir kya tha, sab ek doosre se mile, sab kuch bilkul perfect tha, aur december mein shaadi ho gai

Sangatji sochiye - Hamaare samaj main shaadi ek kitni hi badi baat hai. Pariwaar ki izzat, rutbah, bachhon ke itne saare sapne, unke programs sab hi toh jud jaate hai. Aur yaha ek 21 saal ki ladki, unke mata pita sirf aur sirf Guruji ke aadesh pe badhte chale gaye..  

Mujhe yaad hai ki uss raat main so nahi payi. 

HUm apni akankshayon, mehmat, bani ya bigdi baaton ko Shiv ke charnon mein surrender kare, ye ek baat hai..

Lekin apni jeevan ki dor ko iss Qadar prabhu ke haath mein saup dena - samarpan ki parakashtha hai. Bhagwat Gita mein Shri Krishna Arjun ko samjhate gaye, saari srishti aur karm ka Gyan bhi de diya lekin phir bhi uske prashna khatm nahi hue. 

Ant’ha jab apna virat roop dharan kiya toh Arjun samarpit hua

Aur doosri taraf ye parivar jisne day one se wohi kiya jo unhe Guruji ne kaha. Na koi control, na koi question,  No kintu, no parantu, bas ek atal Vishwaas aur ek sampoorna samarpan.

Kamaal hai na Sangatji. 

Dhanya hai aisi sangat aur unka samarpan.

Saubhaya hai mera ki uss din jeevan mein pehli baar samarpan ko dekh payi. Dimaag ka ek bahut bada tala toota. 

Atal and Poorna vishwas ki jo bhi hai, jaisa bhi hai, mere paas Shiv hai aur woh jo bhi kar rahe hai mere best interest mein kar rahe hai, yeh hai Samarpan ka doosra chadhav

Aur kyun na ho, Shiv swayam baar baar apne aap ho samarpit karke humein Samarpan ka sacha aina dikhate hai.

Samudra Manthan ki katha hi le lijiye. Dev aur asur amrit ke liye samudra ko math rahe the. Lekin sabse Pehle nika ek Bhayankar vish— halahala — jo poore brahmand ko jalakar khatam kar sakta tha. Na dev usse rok paaye, na asur. 

Jab ve Shivji ke paas gaye to Srishti ke wo karta dharta uss vish ko apni shaktoyon se jala bhi sakte the. 

Kintu ve Aage badhe aur bina kisi shart ya deri kiye, us vish ko Pi liya

Hriday mein baithe ram tak na pahuch jaye, isi liye usse apne gale mein hi rok liya

Vish itna bhayanak tha ki unka kanth neela ho gaya. Yeh leela unke bal ki nahi unka samarpan hai. Sandesh bhi hai, ki karm ki rah mein sabse pehli mushkile hi aati hai, jitna bada karm utni badi mushkil. 

Shiv keh rahe hai ki mushkilon ke bawajood chalte rehna, sansaar ke vish ko sabr ke saath dharan karna, uski adhwaahat ko hriday mein NA utarna yahi shiv-marg hai.

Aur dekhiye, Shiv jo nirankaar hai, kabhi bhakt ke hathon se gadhe mitti ke parthiv ling me, 

kabhi bhakton ki ek pukar pe 

aneko rooppon mein 

toh kabhi manushya ki simit deh mein 

Guru ban kar hamare ati nikat pahuch jaate hai. 

Karuna toh ve Kailash ki chotiyon se bhi kar sakte hai par hum unke prakash ko chho kar unhe mehsoos kar sake, yeh hai unka upastithi roopi samarpan.

Ma apni kathin tapasya samarpit karti hia, aur woh apna vairagya. Yeh dono ek doosre ke saamne jhukte hain, aur isi paraspar samarpan se poora brahmand santulit hota hai.

Jab arakajta yani chaos chaaron taraf se phel jaata hai toh shuru hota hai unka tandav . Ek aisa nritya jisme niyantran nahi, balki brahmand ke tal pe vishwas hai. Har kadam ek samarpan, har mudra ek shraddha.

Shivji ke samarpan ki baatein karein toh janm-janmantra bhi kam padh jayenge. Samajhne ki mool baat yeh hai ke Parmatma ke Prem ki Bhasha Samarpan Hai. 

Isiliye Shiv Puran ki 7 Samhitaon mein Sabse Pehle Vidyeshwar Samhita aati hai. Uske 32 adhyay humein samjha rahi hai ki jeevan ek nadi ki tarah hai, jiske do kinaare hai.

 Ek taraf — hamara bechain hriday, jo icchhaon aur shankao se ubal raha hai.
 Doosri taraf — Shivji ki anant karuna, jo kripa se umad rahi hai.

Aur in dono ke beech hai samarpan roopi setu.

Is pul par hum apni saari zimmedaariyon ke saath nidar hokar chalte hai— karm karte hue, prem karte hue, rachna karte hue….

Lekin phal? Woh unke charnon mein rakh dete hain.
 Yeh zimmedariyon se muh modhna nahi, brahmand ki har shakti se milne ka bindu hai.

Aapko yaad hoga Rishiyon ka woh pehla prashna
 “Kali Yug ke andheron me, jab manushya bhram, lobh aur bhay me dooba rahega, to mukti ka raasta kya hai?”

Mukti ka raasta ek hi hai - aur woh samarpan. Agar Shiv ke prakash mein ghulna hai toh unhi jaisa banana padhta hai.

Par baithe bithaye toh aayega nahin! HUm koi karm na kare, ya kare toh aadha adhura karein aur bas keh de, ke Shiv ke Charnon mein arpit hai - yeh aalsya hai, samarpan nahin.

Aur Shastra anusaar apradh hai. 

Issiliye ek ke baad ek adhyayon mein weh humein shiv ko samarpit hona sikhate hai. 

Karat karat abhyas ke jadhmati hot sujaat.

Par pehle hi adhyay mein bata bhi dete hai ki Shivji ki kathaon ko sunana, unke naam ka jaap aur kirtan karne se hamara safar shuru zaroor hota hai, par unke Baare main sochna unn ko jeevan mein utarna sabse zyada zaroori hai. Nahin toh Samudra ke beech hokar bhi hum sukhe hi reh jayenge

Jaise samhita badhti chali jaati hai, Sutji ek ek karke hame apne jeevan ko Shivmarg se jodne ka raatsa dikhate hai.

Sadachar, Grihasth jeevan, Daan, Puja, Jaap, yogytata, bal, karm  Jeevan ke har pehlu ko dheere dheere Shiv ko Arpit Karne ka marg

Par aakhri adhyay mein Sutji kehte hai, 

Har kriya abhyas hai, taiyaari uss mahaan yagya ki, jismein antim aahuti hai — hamara ahankaar.

Ahankaar hi woh sabse kathin ganth hai, jisne humein poori tarah se baadh rakha hai
 Jis din Khuli Ussi din mukti hai.

Bilkul waise hi jaise baarish ki ek boond, jo patte par tik gayi hai.
 Neeche samundar hai, lekin woh chipki rehti hai apne chhote se “main” se.
 Phir ek jhonka aata hai… aur boond gir jaati hai.
 Kho jaati hai kya? Nahi.
 Woh to samundar ban jaati hai — apni seema tod kar, anant mein sama jaati hai.

Sangatji, yaad hai Jyotiling ki katha? Jo shuru hoti hai Brahmaji aur Vishnuji ke ahankaar se. 

Tab Shiv ji ne unke ahankaar ko todne ke liye  ek aisa prachand agni ling banaya jiska na koi adi tha na ant. 

Apni budhi, bal, aur yogyata par garv karne wale Brahma aur Vishnu na hi uska Aadhar pa sake, nahi ant. 

Vishnu ji ko samajh mein aagaya, unhone vinamrata se apne ahankaar ka samarpan kiya aur Shiv ko pa Liya

Brahma ji apne ahankaar mein hi lage Rahe, toh dukh paya.

Sangatji iss katha mein hamaare jeevan ke liye ek bahut important message hai. 

Jab Brahma aur Vidhnu ki ladai apni charam Seema pe thi aur devtaa Shiv ji ke paas Srishti ko bachaane ke liye pahunche, 

ve apni shakti se uss yudhh ko ek kshan me rok bhi sakte the

Par unhone Jyotiling ka roop Liya. Yugon tak bane rahe. Kyun? Sirf issliye ki  ve dono apne ahankaar ko pehchaan sake.

Sutji ne ye katha bilkul shuru mein sunai. Ek dilasa diya,  

 ki sirf main aur aap hi ahankaar se nahi joojh rahe, 

bade bade devta bhi iski pakad mein aa jate hai. 

Aur Shiv 

Ve to apna ling kisi bhi dhaatu se bana sakte the, lekin unhone Jyoti ko chuna - 

kyunki ahankar ke ghane se ghane andhkar ko sirf parmatma ki roshni hi kaat sakti hai

Apni zid, niyantran aur ahankaar ke andhere ko unke prakash mein rakh dena hi Samarpan ka aakhri aur sabse zaroori chadav hai.

Agar hum ahankaar na chhod paaye, toh hum bhi uss sunehre mandir jaise ban jaate hain.
 Jahaan deewarein chamak rahi hain, deep jal rahe hain, ghanti baj rahi hai…
 aur hum apni hi sewa mein madhosh hain.

Lekin garbhgrih khaali hai.

Uff ahankaar to itna chalak hai ki sewa mein bhi “main” ko jod deta hai.

Par Shiv ji ka sandesh ek dum clear hai - jahaan bhi ahankaar baitha ho, wahan Shiv virajmaan nahi hote.

chakachond chahe kitni bhi ho — ant’ha bilkul khaali hai.

Sangatji, Puran kisi alokik lok ki katha nahin - humaare jeevan ki katha hai. Yeh sekdo saal purana Granth aaj bhi utna hi naya hai jitna kabhi tha. Kyunki chahe manushya ho ya dev, problem wahi hai aur solution bhi wahi. 

Gehri baatein gehraiyon me hi milti hai, Doori agar hai toh sirf hamaare manan ki - tabhi Guruji bhi kehte the 3 baar padoge toh samajh mein aani shuru Hogi. 

Hamare fast content world mein, dhyan hi sabse badi luxury ban gaya hai. Chaliye aaj se ussi ko arpit karne ka abhyas shuru karein.  Har Roz sirf 10/15 minute, ek chapter padhne ki Aadat daaliye. Isiliye nahi kyuki Shiv mil jayenge - ve to akashon ke Akash hai - aur unka prakash kal pal, har jagah upasthit hai. 

Question is - kya hum maujood hai ki nahi? 

Ab milenge somvaar ko Rudra Samhita ke pehle khand ke saath -

Tab tak ke liye Guruji ka shukrana karte hue, unke mantra jaap se saath aaj ka episode yahi samapt karte hai.

Om Namah Shivay…

Shukrana Guruji

Thank you Sangatji

Jai Guruji